நீங்கள் தேடியது "போக்குவரத்து காவல் துறை"

பொது மக்கள் அனைவரும் போக்குவரத்து விதிமுறைகளை முறையாக பின்பற்ற வைக்க பூனே நகர போக்குவரத்துக் காவல் துறை மிகவும் கடுமையாக இருக்கிறது. போக்குவரத்து காவல் துறையின் துணை ஆணையர் தேஜஸ்வி சத்புட் விதிகளை மீறுவோர் சட்டத்தின் பிடியில் இருந்து தப்பாமல் இருக்க அனைத்து நடவடிக்கைகளையும் மேற்கொண்டு வருகிறார். 

இவரது கடுமையான நடவடிக்கைக்கு எடுத்துக்காட்டாக பூனே நகர போக்குவரத்து விதிமீறல் அபராத தொகை இருக்கிறது. இதுவரை போக்குவரத்து விதிமீறல்களுக்காக ரூ.22.55 கோடி அபராதமாக வசூலிக்கப்பட்டுள்ளதாக பூனே நகர போக்குவரத்து காவல் துறை அறிவித்துள்ளது. 

நேம் அன்ட் ஷேம் எனும் திட்டத்தை பூனே நகர போக்குவரத்து காவல் துறை சமீபத்தில் அறிமுகம் செய்தது. இதில் போக்குவரத்து விதிகளை மீறுவோரின் புகைப்படம் மற்றும் இதர விவரங்களை காவல் துறையின் சமூக வலைத்தள பக்கத்தில் பகிரப்படுகின்றன. இத்துடன் விதிமீறுபவர்களின் டாப் 200 பட்டியலும் தயார் செய்யப்பட்டுள்ளது.

விதிமீறுவோர் சிக்கினால், விதிமீறலுக்கு ஏற்ப அபராத தொகை அவர்களுக்கு இ-செல்லான்கள் மூலம் அனுப்பப்படுகிறது. அதன் பின் அபராத தொகையை போக்குவரத்து காவல் துறையின் அதிகாரப்பூர்வ வலைத்தளத்தில் செலுத்த வேண்டும். 

விதிமீறியவர்களின் பட்டியலை சுவாரஸ்யப்படுத்தும் வகையில், ஒருவர் 32 முறை விதிமீறி முதலிடத்திலும் மற்றொருவர் 20 முறை என இரண்டாவது இடம் பிடித்துள்ளார். ஜனவரி 1, 2018 முதல் கடுமையாக்கப்பட்ட விதிகள், ஆகஸ்டு 31, 2018 வரை மொத்தம் 10,18,560 வழக்குகள் பதிவு செய்யப்பட்டுள்ளன.

பத்து லட்சம் வழக்குகளில் இதுவரை ரூ.22,54,62,250 வசூலிக்கப்பட்டு இருப்பதாக போக்குவரத்து காவல் துறை சார்பில் தெரிவிக்கப்பட்டுள்ளது. 

போக்குவரத்து விதிமீறுவோரில் பெரும்பாலானோர் சிக்னல்களில் நிறுத்தாமல் செல்வது, மக்கள் சாலையை கடக்கும் வழிகளை கடப்பது, நோ பார்க்கிங் பகுதியில் வாகனங்களை நிறுத்துவது, ஹெல்மெட் அணியாமல் வாகனங்களில் செல்வது, சீட் பெல்ட் போடாமல் கார் பயணம் செய்வது, வாகனம் ஓட்டும் போது மொபைல் போன் பயன்படுத்துவது உள்ளிட்டவை இருக்கிறது.

மைசூரு நகர போக்குவரத்து காவல் துறைக்கு 'அன்றைய' வாகன சோதனை வழக்கமானதாக இருக்கவில்லை. வாகன சோதனையின் போது சிக்கிய ஹோன்டா ஆக்டிவா காவல் துறையினரின் நீண்ட நாள் தேடலுக்கு முற்றுப்புள்ளி வைத்தது. 

போக்குவரத்து காவல் துறையினர் மடக்கிய குறிப்பிட்ட ஹோன்டா ஆக்டிவா மீது ஏற்கனவே 635 போக்குவரத்து விதிமீறல்கள் நிலுவையில் இருந்தது, காவல் துறையினருக்கு அதிர்ச்சி கலந்த ஆனந்த உணர்வை ஏற்படுத்தியது. ஆக்டிவா ஸ்கூட்டரின் பதிவு எண் மூலம் நிலுவையில் இருந்த விதிமீறல் விவரங்களை காவல் துறையினர் தெரிந்து கொண்டனர்.

சிறிதளவு விதிமீறல் என்றாலே கொதித்தெழும் போக்குவரத்து காவல்துறையினர், இத்தனை விதிமீறல்களுக்கு பெரிய தொகையை அபராதமாக கணக்கிட்டு, வாகனத்தை ஓட்டிவந்தவர் கையில் ஒப்படைத்ததோடு, ஸ்கூட்டரை பறிமுதல் செய்தனர். விதிமீறல்களுக்கு மொத்தமாக குறிப்பிட்ட ஆக்டிவா ஸ்கூட்டருக்கு ரூ.63,500 அபராதமாக விதித்தனர். 

மேலும் விதிமீறியவர் மீது வழக்க தொடர்ந்து அபராத தொகையை பெற முடிவு செய்துள்ளோம். நீதிமன்ற உத்தரவு வரும் வரை காத்திருப்போம் என போக்குவரத்து காவல் துறை ஆய்வாளர் ஜெயக்குமார் தெரிவித்தார்.

மைசூருவில் புத்தம் புதிய ஹோன்டா ஆக்டிவா விலை ரூ.66,000-க்கு விற்பனை செய்யப்படுகிறது. தற்சமயம் போக்குவரத்து காவல் துறையினர் பறிமுதல் செய்துள்ள ஹோன்டா ஆக்டிவா 2015-ம் ஆண்டு பதிவு செய்யப்பட்டுள்ளது. இதுவரை இந்த ஸ்கூட்டரின் உரிமையாளர் குறித்த விவரங்கள் அறியப்படவில்லை. காவல் துறையினர் ஸ்கூட்டரின் உரிமையாளரை கண்டறியும் பணிகளை மேற்கொண்டு வருவதாக தெரிவித்துள்ளனர்.

மேலும் இத்தகைய அபராத தொகையை எவ்வாறு மீட்பது என்ற யோசனையில் போலீசார் ஈடுபட்டுள்ளனர். #TrafficOfficers

Source: Cartoq

புனே:

இந்தியாவில் நோ பார்க்கிங்கில் நிறுத்தப்படும் வாகனங்களை போக்குவரத்து போலீசார் அப்புறப்படுத்துவது வழக்கமான காரியம் தான். எனினும் வாகனத்துடன் சேர்த்து அதன் மீது உட்காந்து இருந்தவரையும் சேர்த்து போலீசார் அப்புறப்படுத்திய சம்பவம் நடந்துள்ளது.

புனேவின் விமன் நகரில் பகுதியின் நோ பார்க்கிங்கில் நிறுத்தப்பட்டு இருந்த பைக்கை அதன் உரிமையாளருடன் போக்குவரத்து போலீசார் அப்புறப்படுத்தும் வீடியோ இணையத்தில் பதிவிடப்பட்டுள்ளது. 

மார்ச் 30-ம் தேதி விமன் நகரில் நடைபெற்றிருக்கும் சம்பவத்தில், சாலையில் தவறான இடத்தில் நிறுத்தப்பட்டு இருந்த மோட்டார் சைக்கிளில் இளைஞர் ஒருவர் அமர்ந்து இருக்கிறார். மோட்டார் சைக்கிளில் இருந்து இறங்கும் படி கூறியதால் போலீசாருடன் நடைபெற்ற வாக்குவாதத்தில் ஆத்திரமடைந்த போலீசார் வாகனம் மற்றும் இளைஞரையும் சேர்த்து அப்புறப்படுத்தும் வாகனத்தில் ஏற்றியிருக்கின்றனர்.

பின் சிறிது தூரம் சென்றதும் இளைஞரை போலீசார் இறக்கிவிட்டிருக்கின்றனர். இந்த விவகாரத்தில் மோட்டார்சைக்கிள் உரிமையாளருக்கு அபராதம் விதிக்கப்பட்டதாக தெரிவிக்கப்பட்டது.

“இது போன்ற நடவடிக்கை முற்றிலும் தவறு. இதுகுறித்து பதில் அளிக்க சம்பவ இடத்தில் இருந்த துணை ஆய்வாளருக்கு நோட்டீஸ் வழங்கப்பட்டுள்ளது. அவர் மீது உரிய நடவடிக்கை எடுக்கப்படும். இதே போன்று சம்பவத்தில் தொடர்புடைய மற்ற அதிகாரிகள் தவறு செய்தது உறுதியானால் நடவடிக்கை எடுக்கப்படும். சம்பந்தப்பட்ட இளைஞரின் பைக் அது கிடையாது. மேலும் காவல் துறையினருடன் இளைஞர் தவறாக நடந்து கொண்டதாக துணை ஆய்வாளர் என்னிடம் தெரிவித்தார்.” என போக்குவரத்து ஆய்வாளர் பி,ஜி. மிசல் தெரிவித்துள்ளார்.

இதுகுறித்து அஜின்கியா ரிக்ஷா நிறுவனத்தை சேர்ந்த நிதின் புஜ்பல் கூறும் போது, பொது இடங்களில் நிறுத்தப்படும் வாகனங்களை அப்புறப்படுத்தும் அதிகாரிகள் பெரும்பாலும், பொதுமக்களை தரக்குறைவாக நடத்துகின்றனர் என்றார். மேலும் போலீசார் பொது மக்களுக்கு உரிய மறியாதை வழங்க வேண்டும் என்றும் அவர் தெரிவித்தார்.

காவல் துறையினர் மோட்டார்சைக்கிள் மற்றும் அதன் மீது அமர்ந்து இருப்பவரையும் சேர்த்து தூக்கும் வீடியோவை கீழே காணலாம்..,